top of page
  • 作家相片Dicky Hung @ PTS

關於夢想



仔。記得上一次寫畀你嘅文章,已經係5年前,說到關於夢想的事,那時你還年幻,所提及的也較表面同簡單。依家你又大個仔咗,想再寫一篇關於爸爸在夢想旅程中的文章畀你,說多一些,深入一些。


爸爸初初開始追夢,數數,已到了十個年頭,那時只有一股熱血,同對影相嘅熱情,有得影相已經好興奮,不問收穫,只係想做自己熱愛做嘅嘢。憑住呢股熱血, 辭掉了穩定而沉悶嘅銀行工作,低下頭咬實牙關咁衝衝衝。


不知不覺,一年又一年咁過去,漸漸得到客人的支持與介紹,幸運地接到的拍攝工作越嚟越多。係呢個過程,時間過得好快,好忙碌,但係好開心。因為就算再忙再辛苦,都係追緊自己嘅夢,生活彷彿都多咗好多色彩。


追夢嘅過程已經走到第十年。由當初一個人一個相機行李箱,走遍全香港,到不同地方外影拍攝嘅階段,到而家走入自己嘅攝影室,有助理幫手,呢啲都係我似料不及嘅事。然而,由當初一個人自由自在,到依家有租金人工嘅成本,又係另一階段嘅壓力。


如要說在追夢嘅過程中,再大的付出是什麼,那些時間,心機,精神也只是其次,主要令我覺得遺憾的,就係一家人一齊嘅時間真係少咗好多,亦都錯過咗好多你成長嘅寶貴時刻,教導你嘅時間,不能像別的家庭般,放假就一家人到公園玩,一齊參加親子活動。或許就是這原固,更促使我想寫這篇文章比你。想你知道爸爸不在你身邊的時候,爸爸在做些什麼,以及爸爸在追夢時嘅經歷,可作你現在或若干年後的參考。


追逐自己熱愛的事,實現夢想嘅過程,真的會令人生增添很多色彩同意義。不過這次我想說一些快樂背後,而又真實的事給你知道。說這些,是想你會有更好的準備和心態,不單是只知道表面的畫面。


來,就像旅途上遇到朋友般,說說苦。


仔,你知道嗎?追夢嘅旅程係孤獨的,大部份時間都係獨自一人,尤其面對難關的時候,總是要一個人面對同解決。這幾年,這座城市有了很多的變化,由香港嘅運動,疫情,到而家北上消費加外遊等等的種種難關。。。面對難關,面對低潮,有好幾次真係想過放棄追夢。始終,夢想係昴貴的,但係我發現,原來要放棄夢想,都需要有好大嘅勇氣,同豁達。

要放低這麼多年投入嘅時間同心血,回憶起拍攝時有笑有淚嘅畫面。。。放棄,唔容易。。。然而,神奇又幸運的,只要你抱著樂觀的心態,努力去尋找不同的方法,再加以堅持(要相信自己,因為週圍會有很多因素動搖你),難關,不知為何的,總是一關又一關地過。


或者,追夢嘅過程就係不斷面對低潮同順利,而追夢嘅人就係會有一股傻勁,同樂觀嘅心態,

總過得明天會更好,總覺得捱過了這關就冇事,總覺得奇蹟差唔多時候會出現咁。但,我在這段旅程已經走了有多遠?


原來,除非你離開呢個旅程,否則追夢嘅旅程是沒有終點,你也不會知道這趟旅程你已經走了幾份之幾,因為每次達到既定的目標,其實也只是這趟旅程中一個大大小小的里程碑。


又或者這趟旅程,重要的不是何時走到終點,

而是在乎在這趟旅程中,你得到過什麼,留下過什麼。

無論最後能否走到終點,在追夢嘅過程中,已有無比的快樂,有義意的人生。


仔,爸爸會再寫下一篇關於夢想嘅文章比你,因為爸爸仍在旅途中,沿途上還有很多風景,事物還未看到,到時或許會有更多的啟發和領悟,這些,爸爸也很想與你分享。。。


74 次查看0 則留言

最新文章

查看全部

Comments


bottom of page